Presentà a Castel Alfé ël programa ARBUT 2002/’03 për ël piemontèis a scòla
Ël salon verd dël castel ëd Castel’Alfé pien ëd gent a l’ha daje ‘l bin-ëvnù, dumìnica 19 ëd magg, al quart ann ëd programassion ëscolàstica dl’ansëgnament ëd la lenga piemontèisa ant le scòle. Ës programa – ch’a së s-ciama ARBUT – a l’é l’ùnich programa coordinà e organisà ch’a pòrta an manera orgànica l’ansëgnament dël piemontèis ant le scòle (bele che chèich fabiòch a fà visa ‘d nen antajess-ne). Sa serietà e sa fantasìa organisativa st’ann-sì a l’é stàita premià da la partecipassion entusiàsta ‘d 120 classe dë scòla ‘d tut Piemont, con l’apògg dij pare e mare, dij dirigent ëscolàstich e, dzortut, ëd j’anlev.
Camillo Brero, an tan che ideator dij prim programa scolàstich për ël piemontèis e Pressident onorari ‘d Gioventura Piemontèisa, a l’é stàit a Castel’Alfé për spiegheje al pùblich, a j’ansëgnant e a j’autorità present l’amportansa ‘d nen lassé perde la gròssa ardità coltural e literaria ch’a s’esprim an piemontèis e la part ch’a dëv fé la scòla për nen rompe la caden-a ch’an gropa a le generassion passà, për deje n’avnì a nòsta identità ant ël Piemont dël Doimila.
J’ansëgnant ch’a son antërvenù a l’han parlà ‘d soe esperiense, a l’han presentà j’arzultà ‘d sò travaj e a l’han arnovà soa intension ëd seguité l’ann ch’a-i ven. Grazia Calliero, dël Comità sientìfich d’Arbut (e autris, ansema a Rita Previati, dël lìber ëd travaj Ël But) a l’ha parlà dla manera për anteressé le masnà a la coltura local; Ileana Sola Vaggione, responsàbila dl’Album Ufissial dij Docent ëd Lenga Piemontèisa, a l’é antërvenùa an sl’amportansa d’avèj d’ansëgnant bin preparà për seguité e fé chërse ‘l proget.
A la matin Gioventura Piemontèisa a l’ha riunì ij sò rapresentant ëd tute le provinse. Apress un përcors organisativ ëd tre Ciambree (j’ùltime a son ëtnusse ai 10 ëd Mars al castel ëd San Bastian e ai 7 d’Avril a Vila Làscaris a Pianëssa), la riunion ëd Castel Alfé a l’ha elegiù un Consej ëd 17 përson-e e a l’ha confermà Carlo Comòli Resior ëd l’Associassion.
I arcordoma a j’ansëgnant ch’a veulo propon-e ‘l piemontèis a scòla che Gioventura Piemontèisa a buta a disposission ëd docent ausiliari marcà ant l’Album Ufissial.
