Turin a l’é sota ‘l patronagi ‘d San Gioann Batista dai temp ëd l’argin-a Teodolinda. Tuti j’ani ai 24 ëd giugn la Capital a arcòrda sò protetor con na gran festa – che pì a passo j’ani pì a j’ësmija a n’evento ‘d coj ch’a-j piaso tant a coj dël Munissipi, andova che l’identità dla sità a l’é na vira pì stërmà (për chërdje a basta deje na ficia al programa).
Antra maxischermi, defilé ‘d mòda, garaudié, vintage, lingerìa rissorgimentala, majorettes, aikido, tango, jazz, freebord, corse podìstiche, balon, pompista, ant un programa sempe pì Giovanni e manch San, vënner 22 ëd giugn Li Barmenk, la Pro Loco d’Ussej e Armonia a l’han ariessù a artajesse – con la grassiosa toleransa dla Comun-a – na “Notte della Corenda” da 6 ore dël dòp-mesdì a mesaneuit e 1.
Noi i partessiproma sota j’ansëgne dël Comità «Piemont 482» për arcordé la discriminassion ch’a patiss la lenga piemontèisa, ùnica lenga minoritaria dël Piemont (la pì spantià) ancor a la serca dl’arconossiment ch’a l’ha già daje l’UNESCO.
Chi ch’a veul ëvnì con noi a l’ha mach da telefonene o da mandene n’e-mail (info@piemont482.org).