CONCORS 2012
Piemontèis Ancheuj a nunsia che, an colaborassion con la Companìa dij Brandé, con ël Centro Studi «Don Minzoni – Pinin Pacòt», con la Ca Editris «Il Punto-Piemonte in Bancarella» e con ël patrossini dla Region Piemonte e dla Provinsa ’d Turin as proclama la crija për costi concors:
«XXXº PREMI ’D POESÌA» dedicà a la memòria ’d Pinin Pacòt
Ël but a l’é col ëd contribuì a alvé ’l ton ëd l’espression poética arciamandse ai prinsipi detà da Pinin Pacòt e ch’a son ëdcò j’ispirator dij propòsit dël mensil «Piemontèis Ancheuj». Ël tema a l’é lìber.
«XVIIº PREMI ’D PRÒSA» dedicà a la memòria ’d Nino Autelli
La propòsta a l’é cola ’d dé në slans a la pròsa poetica dasend apress a la carzà mostrà da Nino Autelli che con soe bele fàule dle virtù paisan-e a resta sèmper un bel esempi d’ispirassion. Ël tema a l’é lìber.
«IVº PREMI IJ NÒSTRI» Figure dle famije piemontèise» për ëd poesìe, pròse, mùsica, teatro e via fòrt
As presenta torna costa session con ël but ëd cheuje tute le possìbij forme d’espression. La speransa a l’é cola che slargand ël vantaj ëd jë strument a disposission ëd coj ch’a veulo esprime ij sò sentiment e pensé travajand ansima a n’argoment coma col dël tìtol ch’a veul arciamé d’arcòrd, d’emossion, ëd sensassion, ëd sentiment surtì dal cheur a propòsit ëd përson-e importante për nòstra vita, bele se a fan nen part ëd la famija. Un premi special a sarà dàit da Michel dij Bonavé al prim classificà, për arcordé ij sò ch’a-i son pì nen, ma ch’a l’ha gòj d’arcordé con cost arconossiment. La Giurìa a s’arseva la possibiltà ’d premié, an costa session, ëdcò n’euvra sernùa fra cole dj’àutri concors.
«PREMI PËR LE SCÒLE»
A l’é motobin agradìa la partessipassion a costa session ëd le scòle ch’a peulo mandé qualsëssìa tipo ’d travaj, individuaj e/o coletiv, ch’a l’abio coma marca comun-a l’utilisassion d’un-a dle parlade dël Piemont. Ël tema a l’é lìber. Ij travaj pì bej a saran publicà su «Piemontèis Ancheuj» ant la pàgina dedicà a le scòle e a le masnà.
REGOLAMENT
Për ij premi «Pinin Pacòt» e «Nino Autelli» as peul concore con nen pì ’d tre poesìe o tre pròse, tute inédite, për un màssim ëd sinch euvre për minca autor. Për le poesìe a venta nen superé ij tranta vers mentre che le pròse a devo nen esse pì longhe ’d tre cartele con caràter 11 e interlìnea sempia. Për ël premi «Ij nòstri» ij concorent a peulo partessipé con n’euvra inédita ’d minca sòrt, fra cole segnalà anans, con un màssim ëd doe. Për le poesìe a-i é l’arcomandassion a nen superé ij tranta vers mentre për la pròsa a venta nen superé le tre cartele con caràter 11 e interlinea sempia. Për la mùsica e ’l teatro a-i son nen ëd limitassion ëd longhëssa. Për la mùsica a l’é agradìa, dzorpì dlë spartì, na registrassion (CD, Floppy disk, cassiëtta) dël tòch ësmonù, sòn për facilité ’l giudissi dla Giurìa. Ij concorent a dovran specifiché a che session a veulo partessipé. J’argoment sernù ’nt le diverse session a dovran esse conform a la moral comun-a e sensa ofende gnun, nì përson-e nì istitussion. Tute j’euvre, meno che la mùsica e ij dissegn originaj ch’a peulo compagné ij travaj ëd le scòle, a dovran rivé an set (7) còpie a:
SEGRETERÌA dij CONCORS 2012 «PIEMONTÈIS ANCHEUJ»
Strada Settimo, 92 – 10156 TORINO Nen pì an là dël 15 dë Stèmber 2012
(15 settembre 2012).
Le còpie a devo esse anònime e sensa marche ch’a peusso fé arconòsse ij concorent (për chi ch’a dòvra l’ordinator a venta dovré ’l caràter Arial) mach su un-a a dovrà esse arportà nòm, cognòm, adressa, nùmer telefònich e e-mail ëd l’autor. La presensa d’element ch’a van a sfavor ëd l’anonimà a saran considerà coma negativ da la giurìa e se tròp evident ëdcò a la squalìfica.
La grafìa utilisà a dovrà esse cola «stòrica», ciamà ’dcò «piemontèisa moderna» o «dij Brandé».
J’euvre mandà a vniran nen rendùe e «Piemontèis Ancheuj» e l’«Armanach dij Brandé» as riservo ògni drit ëd publicassion, ritenendse solevà da qualsëssìa responsabilità o pretèisa da part ëd j’autor o d’àutri.
A ògni partessipant (meno che le scòle) a ven ciamà un cotis ëd 15,00 €, për spèise ’d segreterìa, indipendentement dal nùmer d’euvre mandà.
Ij nòm dij component ëd la Giurìa a saran fàit conòsse dnans ëd la sirimònia ’d premiassion; sò giudissi a l’é nen apelàbil.
PREMI
An conseguensa dël moment grev che l’associassion a viv a l’é pì nen possìbil dé ’d premi an sòld. A vnirà donca stilà na classìfica për minca concors e për ij prim tre a-i saran ëd premi sota forma ’d targhe o cope e ’d lìber. Se i trovroma quàich sponsor i podroma fé ’d premi speciaj a sorprèisa. Për tuti ij partessipant a sarà confessionà na bërgamin-a përsonalisà.
La data (apopré a Novèmber), ël leu e ’l programa detajà dla premiassion a saran publicà an antìcip su «Piemontèis Ancheuj». I l’oma fiusa che ’dcò për ël 2012 a-i sarà la possibilità d’organisé, con l’ocasion ëd la premiassion, la giornà ’d «Piemontèis Ancheuj» con la Santa Mëssa an piemontèis e quàich bel moment ëd coltura, magara ’dcò musical.