«Stòrie e conte dësmentià – Storie e racconti dimenticati» a l’é ‘l lìber, neuv noviss ëd Sergio Donna, an piemontèis e an italian, publicà come j’àutri dl’autor da le edission Ël Torèt/Monginevro Cultura (Turin, via Costigliole 2, pp.200).
Ëd Sergio Donna e ‘d sò angage për Borgh San Pàul, soa passion për la lenga piemontèisa (sislà dal sodalisse con lë chansonnier Beppe Novajra), i l’oma avù ocasion vàire vire ‘d parlé da coste pàgine, e an fà piasì adess lese ste conte d’àutri temp, ch’a l’ha vorsù scrive an piemontèis «perché il piemontese era, in quei tempi, la lingua in cui si raccontavano le storie ai bambini». Racont ch’a ven-o da la memòria, e ch’a veulo esse na testimoniansa, n’omagi d’un fieul a sò Paròto, «l’affetto per mio padre, e la mia riconoscenza per avermi voluto ancora una volta raccontare queste storie – adesso che è molto anziano e malato – con quella sua voce stanca, eppure calda come allora».
Le stòrie a son quat (tradussion an italian a front), doe a l’han coma senari e sfond e protagonista ancora Borgh San Pàul, ël Turin ëd bariera («Crich e cròch e Man-idansin» e «Gioanin mes fòl»), mentre j’àutre a son dël mond campagnin dj’anviron dla sità («La volp e la levr» e «Manco, Tanco e Sìfolansëstin»). Quadret, situassion, figure (pensoma a Madama Lancia) che ancheuj i lesoma coma d’afresch ch’an rivo genit da l’inissi dël sécol passà. Coma «Gionta», appendice, eut canson, quat an italian e quat an piemontèis, scrite e musicà da Beppe Novajra ispirandse ai racont: a son publicà ij test e jë spartì dij refrens. Ij «doi» a l’han an proget peui ‘d fé prest un Cd con le canson. Ij dissegn a son d’Ilaria Urbinati, e l’«Achit» ëd Tòjo Fnoj.
Un lìber grassios, scrit an manera sempia e fàcila, ant un bel piemontèis-turinèis ch’as les volenté, ch’an fa torné për un moment masnà, e che a sarìa bel che ij grand a lesèisso ai sò cit për gionté a la caden-a dle generassion col anel ch’a-i gropa, a fa vive e a fa famija: «La stòria a l’é bela, a fa piasì contela, veusto ch’it la conta?».
a.m. [Albina Malerba] da TorinoSette dël 1m ëd giugn dël 2012 – mersì a PiemontViv