Vilanòva, ël bel pais riva ‘d Casal, da vàire a l’é sede regolar dij cors Arbut ëd piemontèis. Bele a livel coltural ël grup d’ativista ch’a l’é formasse a foson-a e a mostra na vira ‘d pì soa vitalità.
St’ann-sì, giutà da la Comun-a, da Mmin Lussian-a Alson-a, da l’Antòni Costanzo “Rampin” e da M. Giusep Domenicale, a l’ha organisà n’esposission fotogràfica an sla bondosa fàuna ch’a viv an sle tère monfrin-e longh ël Pò, marcà da la presensa dle risere e da n’habitat bin particolar.
Le fòto, tute pijà a Vilanòva, a son esponùe con la registrassion dij vers dle bestie figurà e con le didascalìe bilenghe italian-piemontèis local. Ai 16 ëd gené l’esposission a l’é stàita visità da le masnà dla scòla elementar, ch’a l’han scotà con la boca duverta da nòstr Antòni le stòrie dla bela campagna ‘d Vilanòva e la descrission ëd tute le bestie ch’a la pòpolo.
Costa inissiativa ‘d gran valor naturalìstich e didàtich a l’é na bela e furba manera për rende consient ij cit ëd la realità e dla vita ‘d sò pais, con soa stòria e soa lengua.
