Conferensa stampa ‘d presentassion ëd j’arzultà dla petission popolar për la tùa dla lenga piemontèisa
lùn-es 27 ëd giugn a mesdì an contrà ‘d San Sgond, ant la sede ‘d Gioventura Piemontèisa
La petission popolar “Piemontèis ufissial!” – promovùa dal Moviment coltural “Gioventura Piemontèisa” ant le sman-e passà e sostnùa da 19 grup e associassion ëd tut Piemont – a l’ha passà ‘l but ëd le 10.000 signature rivand a toché ‘l nùmer ëd 12.000.
La petission, dëdlà ‘d vorèj la dëscussion inmedià dle vàire propòste ‘d lej che da ampess a son deposità an Consej Regional e an Parlament, a-j ciama a la Region Piemont ëd desse da fé an tute le sede institussionaj për la tùa dla lenga piemontèisa e për antroduvla ant la lista dle lenghe minoritarie arconossùe da la lej 482/99.
S’inissiativa a ven apress la manifestassion dij 26 d’otóber passà, an facia al Consej Regional, për esige ‘d rëspet dël drit dij Piemontèis a soa lenga e a soa identità. La lenga piemontèisa, patrimòni ‘d pì che tre milion ëd përson-e, a l’é arconossùa tan’me “lenga autònoma” da l’UNESCO e dal Consej ëd l’Europa. Ij pì grand filòlogh ëd j’Università ‘d tut ël mond a armarco soe qualità particolar.
Bele che ‘l but ëd le 10mila signature a sia stàit atendù, la cujìa a va anans séguit a j’ansigh ch’a rivo da tut Piemont.
La conferensa stampa ‘d presentassion a sarà lùn-es 27 ëd giugn 2011 a mesdì ant la sala ‘d Gioventura Piemontèisa, an contrà ‘d San Sgond 7 bis a Turin.
Le signature a saran peui conferìe al Burò dla Pressidensa dël Consej Regional dël Piemont a ‘n quart a 3 bòt.
Vàire parlamentar, consijé e sìndich a l’han sicurà soa presensa.
Anformassion: 329 6864261 – giovpiem@yahoo.it
Gioventura Piemontèisa – Via San Secondo 7 bis – 10128 Torino – 011 7640228 (tel. e fax) – 339 2100604 – 328 1292172
A sosten-o: GIOVENTURA PIEMONTÈISA – CENTRO STUDI DON MINZONI / CA DË STUDI PININ PACÒT / PIEMONTÈIS ANCHEUJ – PIEMONT DEV VIVE – IL NOSTRO TEATRO – ATENE DEL CANAVESE – AMICHE DELLA BIBLIOTECA DI BALZOLA – ASTILIBRI – “ARRIGO FRUSTA” GIORNALISTA PËR ËL PIEMONTÈIS – GLI AMICI DEL CANAVESANO – LA VOS DËL CHEUR – MÈ PIEMONT – L’ARVANGIA – CIRCOLO LANGA ASTIGIANA – GOPIEDMONT – COMPAGNìA DIJ PASTOR – IL CINZANINO – TEATRO ZETA – ARCANCEL – BIBLIOTECA CIVICA “G.DEMICHELIS” DI VILLANOVA MONFERRATO.