Com a dis ël mòt d’un-a dle pì gròsse banche dël mond, Never underestimate the importance of local knowledge: mai sotëstimé l’importansa dle conossense locaj.
E la lenga, a l’é ‘l bin pì pressios ëd na coltura, dont a-j riva tuta la resta.
ARBUT a l’é ‘l prim programa coordinà për mosté la lenga e la coltura piemontèisa ant le scòle, da le mignin a le superior. A l’é ‘n Proget butà su dël 1999 che, da antlora, tùit j’ani a vëdd chërse ‘l nùmer dle classe ch’a-j partécipo e l’entusiasm ëd le masnà e dj’insegnant.
ARBUT a l’é n’ideja ‘d Gioventura Piemontèisa, Moviment coltural nassù dël 1994 për concore a goerné e promeuve l’identità ‘d nòstr Pais an manera moderna, dinàmica, duverta, ant ël contest ëd n’interscambi costant con j’àutre colture europenghe.
Soa contribussion a l’é stàita considerèivola për ël dësvlup dla pianificassion linguìstica an Piemont e për l’arconossiment ufissial ëd la lenga piemontèisa che, dal 1999, a l’é la “lenga regional dël Piemont”. Da sòn a-j riva tuta soa atività, che un a peul conòsse passand ant un-a ‘d soe sedi o pijand contat con ij sò Grup an tut ël Piemont.
ARBUT a agiss ant le scòle proponend a j’insegnant ëd përcors ëd formassion e/o l’agiut ëd docent ëd piemontèis, pogiand ij sò programa an s’un métod amusant e fosonant, sostnù da ‘d test didàtich modern e inovativ studià espress. N’organisassion pronta e pràtica, portà anans da espert ëd lenga e ‘d didàtica, ch’a l’ha an costi ani sitant ëd sucess da cissé fin-a dë speculassion dal nòm ch’a jë smijo.
L’ARBUT, l’original, a l’é col dij tre piumin!
Cos’è ARBUT?
(in italiano)