Ant ij di dla Festa Nassional: Santa Mëssa an piemontèis a Siosse e Historia Subalpina a La Mandria e a Palass Real

A-i saran d’àutre trèi inissiative significante ant ij di dla Festa Nassional.

Saba 9 dë Stèmber a 6 e ‘n quart a-i é la tradissional Santa Mëssa an Piemontèis a la gesiòta ‘d San Mò e San Gra dë Siosse (Sciolze – To), selebrà da don Dumini Catti.

La gesiòta as treuva an sla crosiera ‘d Val Blan antra Vernon e Siosse.

A la surtìa dla selebrassion av ëspeta un rinfresch e ‘d mùsica con Ij Bogianen.

---

Sèmper saba 9 a parte da 3 bòt ël Grup Historia Subalpina a arviva le vìsite al Castél ëd La Mandria con ëd rapresentassion e ‘d danse a la mòda dl’Eutsent. Noi i saroma già là…

---

Livrà le Selebrassion dl’Arneuv dij Vot ëd Soperga ‘d dumìnica 10 dë Stèmber, ant ël dòp-mesdì ël randevó a l’é ancor con Historia Subalpina, ch’a torna për festé la gran Vitòria contra ij fransèis dij 7 dë Stèmber 1706.
A parte da 2 bòt e fin-a a 7 ore, ant le sale dël Palass Real ëd Turin, ël Grup a arcordrà la vita dij Turinèis arlongh ëd col assedi e l’argioissansa për la Vitòria e ij moment ëd gòj ch’a-i era staje an Turin.
Le danse d’época baròca a s’alternran a l’anlustrassion dj’aveniment ëstòrich.
Da 4 ore a ‘n quart a sinch lë spetàcol a sarà dedià a le masnà, ch’a saran tirà an mes a le coreografìe dle danse d’antlora, con la spiegassion dla vita dij giovo ant ël sécol XVIII.
A la matin, da 11,30 a ‘n bòt, ël Grup a arvivrà ij giardin e la cort ëd Palas Real.