A l’età d’82 agn a l’é mancaje a Freyre, ant la provinsa ëd Còrdoba an Argentin-a, ël cantastòrie e òm dë spetàcol Adolfo Barale, per tuti “Gambalunga”, l’artista pì seguì e pì apresià ëd la gran epopea piemontèisa d’Argentin-a.
Për sinquant’agn ëd fila a l’ha tnù dj’ëspetacoj ëd gran fortun-a per tuta la comunità piemontòfona ëd la Pampa Gringa, che a së spantia a caval ëd le provinse ‘d Santa Fé e ‘d Còrdoba.
Tant j’ansian come ij pì giovo a lo seguìo con na grand afession.
“Gambalunga”, stranòm e nòm d’art per via dle longhe gambe che a lo aussavo a 2,05 méter, a l’é ruvà a esse famos an tuta l’Argentin-a dòp che ant j’agn ’60 a l’ha fondà un grop teatral-musical an piemontèis che a piasìa tant al pùblich: spetàcoj pien ëd conte musicaj e ‘d barselëtte carià ëd bon ëspìrit ma sempe rispetose dj’autri, e tute contà an piemontèis.
An pension da vàire temp, ant la vita sivil a l’avìa fàit ël cìvich per soa comun-a ëd Freyre.
Da fianch a lòn, na longa vita dë spetàcol fàita ‘d bon umor e ‘d facessie : a l’é andassne regalandne un soris e tanti bej arcòrd.
A lassa la fomna Clide Ribes e i doi fieuj Henry e Marité, an pì ëd na bela nià ëd novodin.
A soa famija e a tuta la comunità piemontèisa d’Argentin-a ël deul pì sincer ëd j’amis ëd Gioventura.
F. A.
