SLUSSI ‘D POESÌA | Lampi di poesia
Premi Literari | Premio letterario
Tanta gent a diso che la poesìa a l’é mach në slussi d’intuission e un rifless ëd magìa. Fòrsi ch’a l’é nen pròpi parej: a-i é ’dcò tanta técnica stërmà daré, ma col ch’a les a dovrìa nen adessne. Dzoratut se la poesìa a l’é curta coma n’haiku – che an piemontèis peuj as podrìa fin-a ciamesse taj curt, com’a fan da le part dël Mondvì…
E a l’é pròpi tut dedicà ai haiku ël concors ch’a l’ha come tìtol Lampi di poesia/Slussi ’d poesìa che l’Associassion Monginevro Cultura ’d Turin a l’ha anventà e butà su. A-i é temp a mandé ij travaj fin-a a saba 14 ëd magg dël 2016.
Ma lòn ch’a l’é l’haiku? A son djë slussi ’d poesìa butà giù për scrit con lë schema 5, 7, 5: tre vers ch’a l’han sinch sìlabe (ël prim), set sìlabe (lë scond) e torna sinch sìlabe (ël ters).
Ma as peul ëdcò mandesse dij sonèt, n’àutra forma fissa fàita ’d doe quartin-e e ’d doe tërsin-e: na forma che tanti poeta piemontèis a l’han dovrà con ghëddo nen mach ant ij sécoj passà, ma ch’as dòvra fòrt ëdcò al di d’ancheuj.
E për coj ch’a veulo scrive ’d pròsa, as peulo mandesse fin-a dij tòch ëscrit sensa vers ma mach an righe, basta che ’d righe a-i ne sìa almeno 20 e nen pì ’d 40 (papel A4, còrp tipogràfich 12).
Chi ch’a l’ha ’nveuja ’d pijé part al concors a peul felo tant an lenga italian-a coma an lenga piemontèisa. Lenga piemontèisa a veul nen mach dì la koinè turinèisa, tipo cola ch’i dovroma sì adess: ògni dialèt dël piemontèis a va bin, e ’dcò coj ch’a stan a la bòina dla region e a parlo fòrt divers dai turinèis a peulo dovré dësgenà sò lengagi dël pais. A sarìa mej, però, ch’a scrivèisso tuti con la grafìa Pacòt-Viglongh, visadì la Grafìa dij Brandé.
Tute j’àutre còse da savej as peulo trovesse an fasand un clich al sit http://www.monginevrocultura.net/?page_id=8438
Nicola Duberti
Università degli Studi di Torino
Dipartimento di Studi umanistici
Corso di Laurea Magistrale in Scienze Linguistiche