Tùit a s’arcòrdo che l’ann passà, ai 30 d’aost, “cheidun” a l’ha daje ‘l feu a cola part dla Cavalarissa Real ëd Turin che fin-a dal 1948 a ospitava l’ex-Cral ëd la Coron-a, ël “Circolo Beni Demaniali”.
Ël dësastr a l’era rivà dòp ëd mèis d’intimidassion për feje pijé soe ghënnìe al Cìrcol e gavesslo d’ant ij pé, giusta përchè ch’a l’avìa un contrat regolar për resté andrinta soa sede stòrica.
Ël feu – che për lòn gnun a l’ha pagà (e l’ancesta a l’é già stàita archivià) – a l’ha nen dësmortà la veuja ‘d vive dël Cìrcol, an particolar cola ‘d Gianni e Loredan-a Galliano. Dòp pòch pì che n’ani ël “Circolo Beni Demaniali” a l’ha ancheuj na neuva sede operativa an via Spàlato 15, an Borgh San Pàul – bele se gnun a l’ha arnunsià a torné, tòst o tard, ant ij locaj dla Cavalarissa.
E con la sede neuva a s’anandio d’atività neuve, ch’as gionto a cole che ‘l Cìrcol a l’ha mai chità, ospità an d’àutri locaj. La novarìa a l’é che ‘l “Circolo Beni Demaniali” a deurb soa sede dcò a d’àutre realità colturaj che, parèj, a peulo trové na ca a Turin për travajé tùit ansema an armonìa e colaborassion.
Le prime inissiative a son cole ch’as peulo les-se an sël tilet sì-sota.
L’anvit për tùit – dzortut për ij Turinèis – a l’é col d’ëvnì trovene e ‘d dene na man për fé vive costa oportunità neuva për l’identità piemontèisa.
