J.L. Lagrange a l’ha dàit ëd contribussion amportante an teorìa dij nùmer, a l’ha dësvlupà ‘l càlcol dle variassion, a l’ha delignà ij fondament ëd la mecànica rassional, a l’ha contribuì an manera fondamental a l’ëstudi dj’equassion diferensiaj e a l’é stàit n’antecessor ëd la teorìa dij grup. An astronomìa a l’ha mnà d’arserche an sij càlcoj ëd la librassion lunar e dij moviment dij pianeta.
Professor ëd “matemàtiche” a le Scòle teòriche d’Artijarìa e Fortificassion ëd nòstr Ëstat, a l’é stàit antra ij fondador ëd l’Academia dle Siense ‘d Turin.
Ël grand Euler, dël 1759, a l’avìa falo nominé a l’Academia ‘d Berlin; dël 1766 a l’era stàit ciamà a arlevé Euler midem an tan che pressident ëd la classe dë Siense. Dël 1786, anvità dal rè Luis XVI ëd Fransa, a l’ha tramuvasse a Paris për ëvnì fé part ëd l’Académie des Sciences; là a l’é stàit nominà pressident ëd la Comission ch’a l’avìo confidaje ‘d fissé ‘n sistema neuv ëd pèis e mzure, ël sistema métrich decimal. A l’é mòrt dël 1813 e a l’é sotrà ant ël Pantheon ëd Paris.