Dël 1885 a dëmostra sperimentalment j’arzultà dij sò studi: l’esistensa d’un camp magnétich rotativ generà con ël mojen ëd doe bobin-e fisse, perpendicolar antra ‘d lor, përcorùe da corent isofrequensiaj e dësfasà ‘d 90°; un pcit cilìndër d’aram, mojà ant ël camp magnétich, as buta an moviment, con maravìa dij present, sota l’assion ëd le fòrse eletrodinàmiche antra camp rotativ e corent indote.
Con costi esperiment as deurb la stra dla realisassion dël motor elétrich assìncron.
L’anvension dël motor assìncron e ij sò studi sël fonsionament e sël rendiment dij transformador a l’han cangià ‘l mond.
Galilé Ferràris a l’é mòrt ai 7 ëd fërvé dël 1897 a soa ca a Turin, an Contrà dla Providensa (via XX settembre 46).
A l’avìa sospendù soa lession an càusa a la frev fòrta. “Monsù, la màchina a l’é guasta, i peuss pa andé anans”, a l’avìa dit an congedandse da j’ëstudent.