Ël Consej Regional dël Piemont a l’ha pen-a arnovà sò sit internet e la neuva pì voajanta a l’é la presensa dla version an piemontèis.
L’arcesta dël sit istitussional ant nòstra lenga as portava anans da ampess e apreu ‘d tute le gionte ch’a son altërnasse an costi desani.
Già da pì ‘d set agn Gioventura Piemontèisa a l’avìa smonù soa consulensa gratuìa për soagné la version piemontèisa dël sit. As dirà: a gràtis a va mai bin, da già che le tradussion ant j’àutre lenghe as pago; a l’è vèi, ma ‘l nòstr a vorìa esse ‘n gest ëd disponibilità e ‘d bon-a volontà. L’ùltima vira a fà mach chèich ësman-a, arlongh ëd n’ancontr positiv con la dirigensa dl’Ufissi stampa dël Consej, ch’a l’era diciarasse motoben disponìbila.
E an efét a l’è stàita ‘d paròla. I soma peui nen stàit noi a redige ‘l test, ma a l’é nen lòn ch’a conta: la lenga a l’è tratà con rispet e con la dignità ch’as mérita.
I stërmoma nen la sodisfassion për cort arzultà, dòp d’agn e d’agn d’arceste ansistente da part dij Piemontèis ch’a vorìo mach vëdde soa lenga natural a l’onor dël mond.
I savoma tutun ch’i-j soma an camin a feje festa a la normalità: a l’é «normal» che an Piemont as dòvra ‘l piemontèis, bele che an costi temp a sia la normalità a fé notissia. A l’è nompà nen-normal che ij sit ëd le provinse e dle Comun-e (prima antra tute cola ‘d Turin) a séguito a fé visa che an Piemont a sia mai parlasse an piemontèis.
Lòn ch’a l’è rivaje an Consej Regional an mostra che tut as peul conchistesse con n’assion fërma, unìa e sèmper positiva.
4.5.2015