(1902-1982)
A l’é stàit për tuti j’óndes ani ‘d vita d’«Ij Brandé – Giornal ëd Poesìa Piemontèisa» (1946-1957) sò diretor aministrativ. Pinin Pacòt a l’ha sempre vorsulo e avulo dacant ant sò travaj ëd… costrussion dël giornal.
An efet Bërtolòt a l’é mai tirasse andaré quand ch’as tratava ‘d butesse a servissi (bele mach coma… galopin o autista) dj’amis ampegnà ant le «Sèire ‘d Poesìa», ant ij rëscontr ëd coltura e ant jë sconfinament an Provensa (chiel a l’era, ansema a Pinin Pacòt, Aldo Daverio e d’àutri dla «Companìa», Sòcio dël Felibrism Provensal).
Soa disponibilità a l’é stàita pari a soa modestia e soa umiltà, parèj coma la blëssa ‘d soa ànima. E polida, trasparenta, dlicà e squasi genà, coma soa ànima, a l’era soa poesìa.
Soa poesìa ─ un cit bochet ─ che chiel a l’ha vorsù eufre a sò Piemont, squasi ciamand ëscusa. Pinin Pacòt a l’ha scrivù che Renato Bertolotto «a l’é stàit un dij pì ativ fondador ëd la Companìa dij Brandé”. …Chiel, dòp un dësbut brilant, rimarchévol e rimarcà ant ël camp ëd la poesìa piemontèisa… a l’ha preferì posé soa piuma…». (Ij Brandé – n. 153 dël 15.1.1953).
Soa euvra poética, che a passa nen ij vint o tranta componiment an tut, an dà manera d’apressié la dlicadëssa ‘d soa ànima e ‘l candor genit ëd soa ispirassion. Soa poesìa a condivid lë spìrit «squisì» che a l’ha caraterisà l’espression poética dj’amis ëd la «Companìa».
«Ij Brandé», an coj ani, a son riussì a porté ant la Leteratura Piemontèisa na ventà neuva ‘d vera poesìa, ansema a n’arneuv interior profond che a l’ha alvà la vos ëd l’espression leteraria piemontèisa, dandje ‘d vòlte un respir universal (cfr. Musicalbrandé – Giugn 1982).
A l’era nà a Valdlator ai 4 d’Otóber dël 1902. L’amor për sò pais a l’avìa convinciulo a aceté la incombensa ‘d Sìndich ëd Valdlator: responsabilità che a l’ha savù porté a compiment con precision, competensa, inteligensa e passion. [A l’é mòrt a Sëntal a j’8 d’Avril del 1982]. […]
Camillo Brero
Ij Brandé – Armanach ëd Poesìa piemontèisa | 1983