Mort an guera a 25 ani – Sandro Platone poeta dësmentià
A l’era nà a Barge ant ël 1916 e […] l’8 ëd Mars dël 1941 a l’é mòrt an Albanìa durant n’assion ëd guèra.
A l’é ciamà la Sconda Guèra Mondial cola che dal 1940 al 1945 a l’ha mandà a la mòrt ëd generassion ëd giovo an nòm d’un nassionalism anacronìstich. Tra costi giovo un-a dle speranse dla poesìa piemontèisa. Un Poeta mòrt an sël fior ëd soa vita: Sandro Platone.
Soa euvra a l’é, për fòrsa, scarsa, përchè strompà an sël nasse da la guèra. Soa poesìa — cola che noi i conossoma — a l’é tuta ispirà al moment terìbil ëd la tricera e an testimonia la richëssa ëd sò spìrit, fasendne ringreté soa dëspartìa.
[…] I vuroma arciamé al cheur nòstr Poeta, Sandro Platone e con soa poesìa (andoa a-j frisson-a j’ùltim sentiment ëd nostalgìa per soa ca lontan-a e soa tèra piemontèisa che a l’avrìa mai pi vëddù, restandje l’ùltim seugn an cheur) rende onor a tutti i nòstri mòrt an guèra.
Camillo Brero | Stampasera 13.11.1991
La seira dl’alpin
Sandro Platone
Ant l’aria frissanta dla sèira seren-a
na ciòca distanta…
na ciòca spërdùa lagiù ‘nt la pianura
a son-a baudëtta e l’aria as fà scura.
‘Nt la sèira seren-a, lassù, tra ij giassé
le prime steilin-e prinsipio a sponté.
‘Nt la tenda dla «guardia» ‘l cap pòst e j’alpin
a gieugo le carte dëdnans a ‘n fiasch ‘d vin.
La piuma dl’alpin dë dzora al torent
tramola a la frèida carëssa dël vent.
Tramola la piuma ma ‘l cheur l’é sicur
e l’euj drit e fiss përtusa lë scur.
E ‘ntant sò pensé con rëgret as na và
dedlà dle montagne ‘nt ël sò bel Monfrà.
Rived sò ciabòt, le soe preus, la colin-a,
arsent ël profum dla soa tèra monfrin-a.
Soa mama ch’a vija da randa al camin,
na bela mariòira che a canta ‘n sël tin…
Pi dur che la ròca, sij neuvi confin
bagnà dal sò sangh, fà la guardla l’Alpin.