Dumìnica 27 ëd luj 2014 a l’é mancaje a l’amprovista la professorëssa turinèisa Renata Capello, un-a dle scritris e dle studiose le pì vajante dla Literatura piemontèisa. Poetëssa, scritris, giornalista, studiosa ‘d lenga e ‘d literatura, mira d’arferiment ëd Gioventura Piemontèisa, ch’a l’ha avù ‘l corage ‘d sosten-e la Càusa ant ij moment pì brut.
Con soa presensa, arzervà e concreta, i përdoma un bagage inmens e ùnich ëd conossense. Nòstr cheur piemontèis a l’é a tòch. Rëgret a soa famija e ai sò amis ch’a la adòro.
.
La barca
Meuire si,
nen esse fàita a tòch
da la mòrt.
Rivé an sla riva d’un gran fium
na matin d’istà,
bin vestìa, bin pentnà
con na caplin-a ‘d paja an testa.
Pudèj dì al barcareul:
«pòrtme da l’àutra part
andova a-i é ij mè,
a l’é tan ch’i-j vëddo nen».
Pudèj parlé tut ël di con lor,
an companìa e an festa,
con j’àngej e l’orchestra.
Na vòlta dëdlà
in dësmentierìa dla barca lesta,
dël fium e dël barcareul
tornà ant la tempesta.
23.2.1998
Nòsta Renata a arposrà ant ël camposanto ‘d Rivareul.
