Nà a Ruej (Val Ciusela) ëd di dij Sant dël 1850, Péder Corzat Vignòt a l’é vagnasse ‘n pòst ëd tut riguard ant la bondosa lista dij poeta ‘d provinsa. Soa poesìa rùstica, sovens irònica, ma vibranta d’umanità, a l’ha falo apressié fin-a da Mistral e da Giacòsa.
La prima edission dle poesìe dël Vignòt, Stil Alpin o la comegia dl’afarism e vari rimi ‘n ruvlàis, a l’é surtìa a dispense dël 1889 stampà a Spessia da la Tipolitografìa C. Sichero. La sconda edission, stampà da Garda, Ivrèja, a l’é dël 1911.
Péder Corzat Vignòt a l’é mòrt a Ruej ai 21 ëd fërvé dël 1921.
La mari
Péder Corzat Vignòt
Una mari a l’é ‘l piasir,
a l’é l’ànima ‘d famija;
quant ch’as vess la mari rir,
ënt la ca a-i é l’alegrìa.
A stant’agn ‘d crussi e ‘d martir
tucc ij di veso la mia,
ch’al pòr pari a dà ‘n sospir
e peu ‘n tòich tuta as deslija.
A dà ‘l còr a la fiolansa,
L’intansion a la pregera,
j’euj, ij brèss a la speransa
al cit tràfich ch’an sosten.
Òh, bon Dìo, fè an manera
‘d conservamla botobèn.