Dumìnica 28 d’avril 2013 a Moncravel a-i é staie la premiassion dël prim concors an lenga piemontèisa ëd Moncravel, soagnà da la Comun-a.
La sala dël consej comunal a l’era pien-a an minca pòst e la gent a-i la fava nen a esse contnùa tuta.
Dòp ël salut dël sìndich Gioann Carlino, dël prsesident ëd giurìa Nico Vinèis (ch’a l’ha spiegà che ‘l piemontèis a l’ha na literatura sgnora ancaminanda dai Sermon Subalpin…) la premiassion a l’é smensà con la consegna dle bërgamin-e (signalassion ëd mérit) për rivé ai premià dle session pròsa e poesia:
Session pròsa:
1m: La guèra ‘d Tart, ëd Gianfranco Ribolzi
2nd: La ramassa dla Befana, ëd Gian Antòni Bertalmìa
3rs: Marco e Alem, ëd Roberto Borgogna
Session poesìa (për la poesìa a-i é stàit doi prim classificà ex-equo):
1m: Sòtola ‘d lus, ëd Vitòria Rollé
1m: Ramà ‘d pieuva, d’Umberto Maria Gillio
2nd: Bèla da morì, ëd Franco Giuffrida
3rs: Bara dij torment, ëd Sergio Marenco
Premi special concorent pì giovo (ant ës cas pì giovna):
Lara Pissinis con “ La conta dël Babi Gròss “
Premi special concorent dj’anviron ëd Moncravel:
Emanuele Regano con la conta “Tonin cit”
Premi special ai concorent ëd Moncravel:
Annelise Regis con la poesìa “La ciresa e ‘l rondinòt”
Davide Laurenti con la poesìa “Già, l’América”
Dòp la premiassion a-i é stàit temp ‘dcò për dësmoresse con l’intepretassion dël “giudissi universal” e dla “parentela baravantan-a” da part ëd Teresio Pissinis, un dj’amis dla lenga piemontèisa ëd Moncravel. Prima dle fòto dij premià i l’oma cantà La Bërgera.
Un ringrassiament special a venta felo a l’assessor për la coltura dla comun-a ‘d Moncravel, madamin Ana Maria Ferrari: sensa ‘d chila e sò travaj ës concors a sarìa pa stàit possìbil.
Lissànder Motin / Alessandro Mottino
«I veu dedicà ‘s concors a tuti ij përson-i ch’a son portà a vërgognassi për la làingua ch’a l’han ampraindì dai sò grand, dai sò pari e mari… magara përquè a l’han nàin avù la possibilità d’avàj n’istrussion e fin-a përquè ël sistema ‘d podàj a-j interessa nàin che soa lingua a sia mossà ant jë scòli e a pòda essi preservà.
Për la midema rason i veu dedicà ‘l concors fin-a a tuti ij popolassion indìgeni dla tèra ch’a son dëspresià e svërgognà fin-a da la mira ‘d soa làingua natural.
An pù i-i tàin a ringrassià j’ansian ëd Moncravel che grassji a lor i l’ho ampraindì ‘l piemontàis, ch’a l’è na marca amportanta dla coltura ëd nòss Pais».
Lissànder Motin
